Jórukórinn

Senn líður að utanferðinni okkar - aðeins rúmur sólarhringur þar til lagt verður í hann héðan frá Selfossi.  Lokaæfingunni var rétt að ljúka og fannst stjórnandanum okkar að einhver ferðagalsi væri kominn í hópinn.  Lagt verður af stað stundvíslega kl. 3:30 frá hótelplaninu.  Sumum karlkyns ferðafélögum finnst óþarflega snemma lagt af stað og eru fullvissir um að ekki verði búið að opna flugafgreiðsluna þegar kórinn mætir í Keflavík.  Þá kom ábending frá kórkonu að hingað til hefðu karlmenn ekki kvartað yfir því að eyða vornóttinni með myndarlegum og skemmtilegum konum. 

Undirbúningur ferðarinnar hefur verið í fullum gangi síðustu daga, bæði í formi söngs og fjáraflana.  Flóamarkaður gekk alveg glimrandi vel.  Kórinn er búinn að planta 24 þúsund furuplöntum.  Mánudagskvöldið 21.maí sundum við á Sólheimum í Grímsnesi á vegum líknarfélagsins Bergmáls.  Einnig sungum við í sjómannadagsmessu í Selfosskirkju á síðasta sunnudag, ásamt því að sjá um messukaffi á eftir.  Í predikun dagsins þá blessaði séra Gunnar ferð kórsins og þá ekki síst heimkomuna.   Við erum því vel undirbúnar. 

Ferðaplanið er komið á hreint og er vægast sagt mjög spennandi.   Ætlunin er að blogga um það hér á þessari síðu ásamt því að setja inn myndir.  Endilega fylgist með.  Nokkar myndir eru komnar inn - kíkið á þær. 

Jórukórinn á Selfossi hélt sína árlegu vortónleika þann 3. og 6.maí síðastliðinn.  Fyrri tónleikarnir voru í  Hólmaröst á Stokkseyri þar sem kaffihúsastemning var alls ráðandi, en seinni tónleikarnir voru í Selfosskirkju.    Tónleikarnir tókust alveg ljómandi vel,    allavega skemmtum við okkur vel.  Að venju var efnisskráin mjög fjölbreytt, íslenskar söngperlur, kirkjuleg tónlist, vinsæl dægurlög og gospellög sem Óskar Einarsson æfði með kórnum þegar hann kom í heimsókn í æfingabúðir kórsins í mars s.l.  Ný útsetning Helenu Káradóttur (fyrrverandi stjórnanda kórsins) var frumflutt.  Það er útsetning á laginu Þér við hlið sem Regína Ósk flutt í Söngvakeppni sjónvarpsins 2006.  Þetta lag er í miklu uppáhaldi hjá okkur, gaman að æfa það og ekki síður að syngja það.